Հավես ճամփորդական օր։ Առավոտյան նախաճաշից հետո քայլքով իջանք Մայր դպրոցի երթուղայինների կայանատեղի։ Տեղավորվեցինք ու շարժվեցինք դեպի Բուսաբանական այգի։ Սովորողների մոտ մի ոգևորություն, մի անհամբերություն… Սիրուն բնություն, կանաչ բույսեր, ծառեր, շշմելու բնություն։ Սովորողները հիացած նայում էին ծառերին, որոնք շատ բարձր էին։ Ճանապարհին սկյուռիկի բներ տեսանք, փորձում էինք փնտրել սկյուռիկներին, բայց չգտանք։ Սովորողները կարդում էին ամեն մի հանդիպած ծառի ցուցատախտակներին գրվածները։ Իսկ մյուս մասն էլ էլեկտրոնային գործիքներով նկարում էր այն, ինչ տեսնում էր։ Զբոսնեցինք, հիացանք սիրուն բնությամբ, ճաշեցինք, մի քիչ երգեցինք ու վերադարձանք դպրոց։
Հերթական կրթական փոխանակումը Աշտարակի «Արևիկ» և Սասունիկի «Արմինե Կարապետիի» մանկապարտեզի սաների և դասավանդողների հետ։ Առավոտյան նախաճաշեցինք ու քայլքով դեպի Մայր դպրոցի երթուղայինների կայանատեղի։ Այս անգամ ուղղությունը Աշտարակի ջրաղացն էր։ Հասնելուն պես սկսեցինք Կրկնազատկի ծեսը տիկին Մարինեի աջակցությամբ։ Էլ ձվախաղ, էլ ձվագլոր, էլ ձվակռիվ, էլ աքլորակռիվ, չիք-չիք, աղամ-աղամ… իսկական ծիսական խաղեր, պարերգեր… 
Հավես ճամփորդական-ստուգատեսային օր։ Առավոտյան նախաճաշեցինք, հագանք մեր գունեղ դեղին շապիկները, քայլքով դեպի Մայր դպրոցի երթուղիներ։ Ուրախ տրամադրությամբ, երգով, պարով հասանք Թումոյի այգի։ Արև, կանաչ, թարմություն… Սկսեցինք աղայանական ընթերցումներով, ապա շարունակեցինք ազգային խաղերով։ Մի լավ հրճվանք ապրեցինք, խոտերին սիրուն-սիրուն պառկեցինք, նկարվեցինք, կերանք փոքրիկ բրդուճները։ Վերջում կատարեցինք շրջակա միջավայրի խնամք։ Սովորողները մեծ ոգևորությամբ հագան ձեռնոցներն ու սկսեցին մաքրել տարածքը։ Շատ հավես, ուրախ ու գարնանային օր։ Վերջում չմոռանաք լսել վեց տարեկանների ռադիոպատումը։
Հավես ուրբաթ, ճամփորդություն դեպի Հ․ Թումանյանի անվան տիկնիկային թատրոն։ Մասնակցեցինք առավոտյան ընդհանուր պարապմունքին, նախաճաշեցինք ու քայլքով դեպի երթուղայինը։ Մի ոգևորություն, մի հրճվանք․․․ Դիտեցինք «Պոչատ աղվեսը» ներկայացումը։ Սովորողները հիացմունքով դիտում էին, իսկ վերջում բողոքեցին, որ շուտ վերջացավ։ Չմոռանաք լսել վեց տարեկանների ռադիոպատումը․․․
Հինգ-վեց տարեկանների բլոգ 